सुरता म चांपा के रहइया स्वतंत्रता सेनानी नारायण प्रसाद बाजपेई...

 संवाद यात्रा/ जांजगीर-चांपा /छत्तीसगढ़ /अनंत थवाईत

देश के स्वतंत्रता आंदोलन म कतको मनखे मन किसिम किसम ले अपन भागीदारी निभाए हावय . स्वतंत्रता आंदोलन घलव हर देश म दु प्रकार ले चलत रहिस एक नरम दल के रूप म त दुसर गरम दल के रूप मे जाने जात रहिस .नरम दल के रूप म गांधीवादी विचारधारा के मनखे मन शांति ढंग ले आंदोलन करय . धरना प्रदर्शन के माध्यम ले मनखे मन ल एकजई करके अंगरेज के खिलाफ लड़ाई लड़े .गरम दल के रूप म क्रांतिकारी मन रहय जउन मन सीधा सीधा अंगरेज अफसर मन उपर बम ,गोली ले हमला करके अंगरेज शासन ल उखाड़ फेंके के सपना साधे रहय .

स्वतंत्रता के ये लड़ाई म एक वर्ग अइसन घलव रहिन जउन मन स्वतंत्रता आंदोलन म शामिल रहइया चाहे वो गरम दल के रहय या फेर नरम दल के रहय ये मन ल बखत पड़े म सहयोग करंय .अंगरेजी शासन के गिरफ्तारी ले बंचावय . अइसने सहयोग करइया मनखे रहिन चांपा के नारायण प्रसाद बाजपेई जी जउन ल स्वतंत्रता के कइ बछर बाद भारत सरकार हर स्वतंत्रता सेनानी घोषित करिस .

बाजपेई जी के बेटा अशोक बाजपेई आउ उंकर जन नता सुधीर बाजपेई ले मिले जानकारी के अनुसार स्वतंत्रता सेनानी नारायण प्रसाद बाजपेई जी के जनम सन 1912  म होय रहिस (तिथी के ठीक ठीक जानकारी नइ हे ).उंकर हायर सेकेण्डरी के पढ़ाई बिलासपुर म होय रहिस . पढ़ाई के बखत जब 1928 म साइमन कमीशन के विरोध म देशभर म आंदोलन होइस तब बिलासपुर म भी जुलुस निकले रहिस ओ जुलूस म नारायण प्रसाद बाजपेई जी घलव शामिल होय रहिन आउ अंगरेज शासन के लाठी खावत जेल भी गय रहिन . स्वदेशी आंदोलन म भी बाजपेई जी बढ़-चढ़ के हिस्सा लेवय आउ विदेशी वस्तु मन के बहिष्कार करे बर मनखे मन ल जगाय के काम करय . 

एक बार  गरम दल के क्रांतिकारी श्याम नारायण कश्मीरी हर (शायद नागपुर म) एक अंगरेज ल गोली मार दे रहिस तब अंगरेज मन श्याम नारायण कश्मीरी ल गिरफ्तार करे बर खोजत रहय .अइसन बखत म श्याम नारायण कश्मीरी चांपा म  रामेश्वर अवस्थी इंहा आइन फेर उंहा ले नारायण प्रसाद बाजपेई हर कश्मीरी जी ल अपन घर के तीर एक ठन घर म राखे रहिन .

चांपा के रहइया होय के सेति महूं हर स्वतंत्रता सेनानी नारायण प्रसाद बाजपेई ल जानत रहेंव  जब भी हमन सदर बाजार जावन उंकर घर ल नहाक के जावन .आवत जावत उंकर संग जय जोहार आउ पैलगी घलव हो जाय .नारायण प्रसाद बाजपेई जी तीन बेटी आउ दु बेटा के बाप रहिन . अभी बाजपेई जी के एक बेटी सुधा तिवारी बिलासपुर आउ एक बेटी शोभा दीक्षित रायपुर म रहिथे आउ बेटा अशोक बाजपेई (स्टेट बैंक ले सेवा निवृत्त) बिलासपुर म रहिथे.

स्वतंत्रता सेनानी नारायण प्रसाद बाजपेई के घर आउ धार्मिक पुस्तक के दुकान सदर बाजार म रहिस .जिहां देवारी के बखत ओमन फटाखा भी बेचय.

स्वतंत्रता सेनानी नारायण प्रसाद बाजपेई जी एक धार्मिक मनखे रहिन नगर म होइया हर धार्मिक साहित्यिक कार्यक्रम म उंकर भागीदारी रहय .सन 2002 म स्वतंत्रता सेनानी नारायण प्रसाद बाजपेई जी अपन भौतिक देह ल त्याग के सरग सिधारे रहिन .

अनंत थवाईत

 चांपा