राहुल के पेशी : आऊ समारू पहारू के गोठ
संवाद यात्रा/जांजगीर-चांपा/छत्तीसगढ़/ अनंत थवाईत
राहुल के पेशी आऊ समारू पहारू के गोठ
समारू..... भइया मोला एक बात समझ नइ आवत हे कि ईडी हर पुछताछ करे बर राहुल ल बलाइस त ओकर संग म बड़का बड़का नेता मन काबर गइन ? ईडी हर तो ओमन ल नइ बलाय रहिस ।
पहारू..... तहूं चोरो बोरो हस भाई अतेक नानकन बात ल भी नइ समझस।
समारू..... नानकन बात ओ कइसे ?
पहारू..... राहुल हर अतेक गियानी नइ हे भाई कि ओहर अकेल्ला ईडी के सवाल के जवाब दे पावय । तेकर सेति ओकर संग म जम्मो बड़का नेता मन घलव गय रहिन ।
समारू..... लानत हे अइसन नेता आऊ ओकर पिछलग्गू मन ल ! जउन मन अइसन नेता ल परधानमंत्री बनाय के सपना देखत हे जउन हर ईडी के छोटकन सवाल के जवाब भी अपन मन ले नइ दे सकय।
पहारू.... राहुल परधानमंतरी बनही कि नइ बनय ये हर तो आने वाला समय हर बताही । लेकिन येक बात हे कि ये नेता मन कइथे आने आऊ करथे आने । येक कोति कइथे कि संविधान आऊ कानून ले बड़का कोनो नोहय । आऊ दूसर कोति जब संविधान के अनुसार कानून हर काम करथे त इ नेता मन हो हल्ला करे लागथे ,आऊ कहे लागथे कि बिपकछी मन के आवाज दबाय के कोशिश करत हे सरकार हर ।
समारू.....सही म भइया ये नेता मन अपन आप ल कानून के ऊपर माने लगथे । यदि कुछु घपला नइ करे हे त अतेक घबराय के का बात हे ईडी हर जउन सवाल पुछय ओकर जवाब दे देवय ।
पहारू..... नेशनल हेराल्ड के केस ल लेके जउन किसिम के गोठ होवत हे ओला सुनके तो अइसे लागत हे कि सिरतो म बड़का घोटाला होय हावय । आऊ ये केस ले बांचे बर राहुल के संग ओकर पारटी के नेता मन हो हल्ला मचावत हे ।
समारू..... तभे तो सत्ता पक्ष के नेता मन बिपकछी ऊपर आरोप लगात हे आऊ कहत हे कि ये मन भ्रष्टाचार के उत्सव मनाय बर सड़क म उतरे हावय ।
पहारू..... आऊ ऊपर ले ये मन अलकरहा गोठ घलव करत हे । सड़क म खुद उतरके जबरन आंदोलन चलावत हे हो हल्ला मचावत हे आउ उपर ले कहत हे परधानमंतरी हर शांति के अपील काबर नइ करत हे ?
टिप्पणियाँ
एक टिप्पणी भेजें