भाजपा नेता (पूर्व आईएएस अफसर ) ओपी चौधरी के आरोप आऊ समारू पहारू के गोठ

संवाद यात्रा जांजगीर-चांपा छत्तीसगढ़ अनंत थवाईत

  ओपी चौधरी के आरोप आऊ समारू पहारू के गोठ

समारू ..... सुने हावस भइया भाजपा नेता पूर्व आई ए एस आफसर ओपी चौधरी के खिलाफ कोरबा पुलिस थाना म एफआईआर लिखागे हावय ।

पहारू.....काबर एफआईआर लिखाय हे भाई ? 

समारू ....ओपी चौधरी हर छत्तीसगढ़ म कोइला चोरी के आरोप लगाय रहिस आऊ विडियो पोस्ट करे रहिस 

पहारू..... जब ओपी चौधरी हर आरोप लगाय हे त ओकर आरोप म कुछु तो सच्चाई हो ही भाई । अतेक बड़का साहेब रहिस त ओला अपन आरोप के गंभीरता के भी जानकारी हो ही। आऊ फेर अब ओहर बिपकछी पार्टी के नेता आय तेकर सेति सत्ता पक्ष के ऊपर आरोप तो लगाबे करही ।

समारू.....आरोप लगाय ले कोनो छेकत नइ हे भइया लेकिन जब ये मामला हर बाढ़त गइस त चौधरी जी हर सफाई देहे लागिस कि वो विडियो पहिली ले वायरल रहिस। अब सवाल ये हे कि ओपी चौधरी जइसे  पढ़े लिखे गियानी हर पुराना विडियो डार के अभी कोइला चोरी के आरोप कइसे लगा दिस ? 

पहारू..... अरे पढ़े लिखे गियानी मनखे मन ले भी भूल चुक हो जाथे भाई । येमा कोन सा बड़ भारी अपराध हो गे ? 

समारू.....ठीक हे बड़ भारी अपराध नोहय लेकिन ओपी चौधरी हर भाजपा के युथ आइकान के रूप म जाने जाथे जब ओकर कस मनखे अइसने करही त बाकी कार्यकर्ता मन म का असर परही ? 

पहारू..... अब का असर परही ओला चौधरी आऊ ओकर कार्यकर्ता मन जानय फेर एक एक बात कहंव ओकर कार्यकर्ता मन भी कम नइ हे । ओहू मन अइसने परचार परसार म लगे रहिथे आऊ उत्ताधर्रा  पोस्ट करत रइथे भले ही ओमन के ये राजनीतिक मजबूरी आय । 

समारू.....भइया येक बात कहंव अगर ओपी चौधरी हर पोस्ट करे के बेरा म थोरकन हौशियारी देखाय रतिस त जादा झमेला म नइ परतिस । 

पहारू ..... ओ कइसे ? 

समारू......अरे भइया देखे होबे पत्रकार मन अपन चैनल म नवा समाचार घलव म जुन्ना विडियो ल देखाथे आऊ सनसनी फइला देथे।  अगर ओइसने ओपी चौधरी हर पोस्ट करे के बेरा म जुन्न विडियो या प्रतिकात्मक विडियो लिख देतिस त ओकर खिलाफ म अतेक बवाल नइ होतिस 

पहारू.... ठीक कहत हस भाई तोर गोठ ले महू सहमत हांव । लेकिन अब जउन होगे तउन होगे अब आघु ले ओपी चौधरी आऊ ओकर कार्यकर्ता मन ल पोस्ट करे  के बेरा म आऊ बयान देहे के बेरा म सावधानी बरतना चाही। नही त पार्टी प्रवक्ता नुपुर शर्मा ल देख लेवय ओला पार्टी हर कइसे निलंबित करिस ।