सरकार हर आम जनता ल नही, बल्कि पेट्रोल डीजल पंप मालिक मन ल राहत पहुंचाय बर टैक्स म कटौती करे हे । पेट्रोल डीजल के दाम म कटौती आऊ समारू पहारू के गोठ

  

संवाद यात्रा/जांजगीर-चांपा/छत्तीसगढ़/ अनंत थवाईत

                        समारू पहारू के गोठ 

समारू..... भइया जानत हावस हमर छत्तीसगढ़ सरकार हर पेट्रोल आऊ डीजल म टैक्स कटौती करके दाम ल कम कर दिस ।

पहारू..... सुने त हांव भाई कतका कम कर दिस तऊन ल तो बता ? 

समारू..... पेट्रोल म एक प्रतिशत आऊ डीजल म दु प्रतिशत कम करे हावय भाई ।

पहारू..... तैं प्रतिशत म झन बता ।  सरकार हर कतेक रुपया कम करे हावय तऊन ल फरहर बता । 

समारू..... भइया तैं अइसना काबर पुछत हावस ? टेक्स म कटौती करे हावय त भाव घलव कम तो होय हे न ? जेमा हमन ल खुश होना चाही । 

पहारू..... ठीक हे भाई खुश होना चाही ऊहां तक तोर गोठ हर ठीक हे फेर बने फोरिया के गोठिया  सरकार हर कतेक रुपया कम करे हावय पेट्रोल आऊ डीजल म ? 

समारू..... बताय तो हांव भइया पेट्रोल म एक प्रतिशत आऊ डीजल म दु प्रतिशत दाम कम करे हावय । 

पहारू..... देख भाई सरकार के मंत्री मुख्यमंत्री मन दाम कम करे के बेरा म रुपया ल बताय म लजावत हावय  आऊ प्रतिशत म बतावत हे वो तो ठीक हे, काबर कि ओमन राजनीतिक मनखे हे उंकर हर गोठ बात म राजनीति समाय रइथे। 

समारू..... महुं हर तो बताय हांवव पेट्रोल डीजल के दाम म कतका प्रतिशत कम होवय हावय लेकिन तैं हर कतका रुपया कम होय हावय तउन गोठ म अटके हावस । तोर ये सवाल करइ हर राजनीतिक नोहय का ? 

पहारू..... हां राजनीतिक तो हावय लेकिन तै जउन ढंग ले दाम कम करे के किल्ली पारत हस वो हर अच्छा बात नोहय । पेट्रोल म नब्बे पइसा आऊ डीजल म एक रूपया पैंतालीस पइसा कम करे हर ऊंट के मुंह म जीरा वाला कहावत ल उजागर करत हे । आऊ ओहू म भाजपा हर जब सड़क म आंदोलन करिस त पेट्रोल डीजल के भाव कम होय हे । 

समारू..... फेर तैं दाम करे के गोठ म भाजपा कांग्रेस ल लावत हस ये हर अच्छा बात हे का? अगर मैं कइहौं कि भाजपा के आंदोलन म जादा जोर नइ रहिस तेकर खातिर पेट्रोल डीजल दाम हर भी जादा कम नइ होइस त तैं हर मोर ऊपर गुस्सा करे लागबे । 

पहारू..... देख भाई तैं चोरो बोरो हस कति के गोठ ल कति ले जाथस । वइसे मै तोला  छत्तीसगढ़ सरकार दुवारा पेट्रोल डीजल के दाम कम करे के असली बात बतावंव ? 

समारू..... अब येमा असली नकली के गोठ कहां ले तैं लेआय ? ले चल बता महुं तो सुनव कि असली बात काय हे । 

पहारू.....भाई असल म छत्तीसगढ़ सरकार हर पेट्रोल डीजल के दाम ल आम जनता बर कम नइ करे हे ।ओहर पेट्रोल डीजल पंप मालिक मन ल फायदा पहुंचाय बर दाम ल  कम करे हावय । 

समारू..... तहूं गजब गोठ करत हस भइया पेट्रोल डीजल के दाम कम होय ले जनता ल फायदा होय हावय आऊ तैं कहत हस पेट्रोल पंप मालिक के फायदा बर दाम कम करे हावय अइसन भला कइसे हो सकत हे ? 

पहारू..... देख भाई सीधा सीधा गोठ हे कि हमर छत्तीसगढ़ सीमा ले जुरे आने प्रदेश म पेट्रोल डीजल के भाव कम हे । तेकर सेति छत्तीसगढ़ सीमा से लगे हुए जम्मो कोति के पेट्रोल डीजल पंप के बिक्री हर कम होगे रहिस । इहि मन ल फायदा पहुंचाय बर छत्तीसगढ़ सरकार हर पेट्रोल डीजल के भाव ल थोरकन कम करे हावय ।

समारू.....  वाह भइया तोर सोच के बलिहारी हे । कतका दुरिहा के गोठ ल तैं सोच डारे । आऊ मै पेट्रोल डीजल के थोरकन दाम कम होय के गोठ म अटके रहिगें। मैं समझ गेंव कि छत्तीसगढ़ के सीमा ले लगे पेट्रोल डीजल पंप के बिक्री कम होय ले सीधा सीधा सरकार के राजस्व म घाटा होवत रहिस तेकरे सेति सरकार हर दाम कम करे हावय । 

पहारू..... हां अब तैं ठीक समझे भाई । अब ये गोठ ल इही मेर छेवर कर मोला आऊ काम बुता करे बर हावय । ये नेता मन के राजनीतिक चाल के कतको गोठ करबे नइ सिराय ।