शहीद मन के सुरता म "मां तुझे सलाम" संगीत संझा कार्यक्रम बहुत जल्दी आयोजित होही इंडियन आइडल फेम मोनिका पॉन्डाल पहली बार आही छत्तीसगढ़

संवाद यात्रा /जांजगीर-चांपा /छत्तीसगढ़ /अनंत थवाईत 

छत्तीसगढ़ के पावन माटी जांजगीर म येक बार फेर सुनई दिही देशभक्ति गीत आउ गुंजही गरब के जयघोष.इशिका लाइफ फाउंडेशन के बेनर तरी होने वाला ये कार्यक्रम "मां तुझे सलाम - शहीदों के नाम" सीजन 4 ये बखत आउ जोर-शोर ले लहुट के आवत हे. कार्यक्रम म ये बखत "छत्तीसगढ़ गौरव रत्न " सम्मान आउ "पत्रकार सम्मान" घलव होही .जेमा राज्य के नामी गिरामी मनखे मन ल पहुना के रुप मे नेवता देके उंकर सम्मान करे जाही.

ये कार्यक्रम के सबले बड़े बात ये हे कि इंडियन आइडल सीजन 14 के चर्चित कलाकार मोनिका पॉन्डाल पहली बार छत्तीसगढ़ आवत हे ओहर अपन सुग्घर मधुर आवाज म देशभक्ति गीत ले श्रोता मन ल झुमरे बर मजबूर कर दिही .

इशिका लाइफ फाउंडेशन के बेनर म होवइया ये कार्यक्रम के मुखिया आयोजक गोपाल शर्मा बताइन हावय कि ,ये कार्यक्रम शहीद मन के सुरता, नारी शक्ति के सम्मान  आउ ,जनमभूमि बर समरपन के भाव जगाय के उदिम हे .

गोपाल शर्मा हर आघू आउ बताइन कि क्षेत्र के नामी गिरामी मनखे मन ल पहुना बनाके ओमन के सम्मान करे जाही .ओमन के आय ले दूसर मनखे आउ कलाकार मनके उत्साह बाढ़ही .

ये कार्यक्रम कब आउ कहां होही येकर जानकारी बहुत जल्दी लोगन मन ल दिये जाही .