राहुल गांधी हर राजनीतिक फिलिम के राजा बाबू आय : राहुल गांधी के टेक्टर चलाई आऊ समारू पहारू के गोठ

  

संवाद यात्रा/ संपादकीय डेस्क/अनंत थवाईत

                   समारू पहारू के गोठ 

समारू.....भइया जानत हावस काल राहुल गांधी हर किसान मन के संदेश लेके खुद टेक्टर चलावत संसद भवन गय रहिस । ओला किसान मन के बड़ चिंता हे । 

पहारू.....हां भाई जानत हांव । बिना नंबर के टेक्टर चलवइया  राहुल गांधी के ये उदिम हर टीवी म समाचार बनके दिन भर छाय घलव रहिस ।

समारू.....त ये बिसय म तोर का बिचार हे भइया ?

पहारू.....मोर बिचार म तो राहुल गांधी हर अब राजनीतिक फिलिम के राजा बाबू आय ।

समारू..... राजनीति फिलिम के राजा बाबू ओ कइसे ? थोरकन फरहर गोठिया भइया ।

पहारू.....तहूं चोरो बरो हस भाई एक बार म कुछु समझस नहीं । तै गोंविदा के फिलिम राजाबाबू देखे रहे न?

समारू......हां भइया देखे रहेंव ओ फिलिम म गोंविदा हर बड़ सुग्घर अभिनय करे रहिस कभु वकील बन जाय त कभु पुलिस इंस्पेक्टर, कभु डाक्टर बन जाय त कभु नेता बन जाय ।

पहारू.....ठीक ओइसने ये राहुल गांधी हर राजनीतिक फिलिम के राजा बाबू आय । अर्थ बेवस्था के गोठ करत कभु अर्थशास्त्री बन जाथे त कभु धारा तीन सौ सत्तर के गोठ करत संविधान विशेषज्ञ बन जाथे मजदूर के गोठ करत कभु मजदूर बन जाथे । किसान समस्या के गोठ करत कल ओहर किसान बनके टेक्टर चलाइस ।

समारू.....ठीक कहे भइया मोला सुरता आगे अइ गोठ ल काल जीटीवी के डीएनए कार्यक्रम म वरिष्ठ पत्रकार सुधीर चौधरी घलव करत रहिस । ओहर कहत रहिस कि राहुल गांधी के टेक्टर चलाई राजनीतिक फिलिम के एक हिस्सा रहिस । कइ पत्रकार मन बर ये फिलिम हर प्रचार प्रसार के साधन घलव बने रहिस । राहुल गांधी हर अपन छबि ल चमकाय खातिर किसिम किसिम के उदिम करत फोटु खिंचवाथे ।

पहारू.....एक ठन बात आऊ हे भाई ये राहुल गांधी हर अपन छबि चमकाय बर जऊन उदिम करथे ओहर उलटा हो जाथे ओकर छबि आऊ बिगड़ जाथे । काल किसान हितैषी बनके कानुन के गोठ करत खुद कानून ल टोर दिस 

समारू.....कानून ल टोर दिस ओ कइसे ?

पहारू.....एक तो बिना नंबर के टेक्टर चलाके यातायात नियम ल टोरिस । ऊपर ले टेक्टर ल संसद भवन म चलाय के धमकी वाला गोठ भी करिस ।