डा.चरणदास महंत तन के नही मन के डाक्टर आय : समारू पहारू के गोठ
संवाद यात्रा/जांजगीर-चांपा/छत्तीसगढ़/अनंत थवाईत
समारू पहारू के गोठ
पहारू.....प्रभारी मंत्री जयसिंह के ये गोठ हर जुन्ना होगे भाई । फेर आज तै ये गोठ ल काबर सुरता करत हावस ?
समारू.....मै ओ बखत प्रभारी मंत्री जयसिंह के गोठ के मतलब नइ समझे रहेंव भइया लेकिन अभी अभी जब स्व.बिसाहू दास महंत के पुण्य तिथि के कार्यक्रम होइस त मोला समझ म आइस कि प्रभारी मंत्री जयसिंह हर काबर ओइसने गोठ करे रहिस ।
पहारू.....बड़ अलकरहा गोठ करथ हस भाई । प्रभारी मंत्री के कार्यक्रम अलग रहिस आऊ स्व. बिसाहू दास महंत जी के श्रद्धांजलि कार्यक्रम अलग रहिस , फेर अइसना का होगे कि ये दुनों कार्यक्रम ल जोर के गोठियावत हस ?
समारू..... देख भइया तैं सब जानत समझत हस तभो ले अनजान बनत हस , स्व. बिसाहू दास महंत के श्रद्धांजलि कार्यक्रम हर सरकारी कार्यक्रम रहिस कि निजी कार्यक्रम रहिस तऊन ल बता ?
पहारू..... श्रद्धांजलि कार्यक्रम हर सरकारी नइ रहिस निजी रहिस फेर ये कार्यक्रम म अइसन का होगे कि तोला घुमा फिरा के गोठ करे बर परत हे जउन गोठियाना हे फरहर गोठिया ।
समारू.....मैं येकर सेति ये गोठ ल करत हांव भइया कि बीडीएम अस्पताल म स्व बिसाहू दास महंत जी के श्रद्धांजलि कार्यक्रम होइस त कतका झन भाजपा के नेता मन घलव शामिल होय रहिस।
पहारू......भाजपा के कोन बड़े नेता गय रहिस तउन ल तो बता ?
समारू.....भइया नगर स्तर म कार्यक्रम होथे त स्थानीय नेता मन ही बड़े नेता कहाथे चाहे वो पालिका के पूर्व अध्यक्ष रहय कि पार्षद रहय । आऊ अस्पताल म श्रद्धांजलि के ये कार्यक्रम म भाजपा ले जुरे पूर्व पालिकाध्यक्ष वर्तमान पार्षद के संग भाजपा संगठन ले जुरे जिला आऊ प्रदेश कार्यसमिति के सदस्य मन उपस्थित रहिन । आऊ तो आऊ भाजपा संगठन के जिला इकाई म रह चुके तथा भाजपा सांसद के प्रतिनिधि रह चुके अखिलेश कोमल पाण्डेय हर डा. चरणदास महंत के आघु कांग्रेस म प्रवेश भी करिस । ये सब घटनाक्रम ल देखबे भइया त येकर राजनीतिक मतलब तो जरूर निकलथे ।
पहारू.....सुन भाई तोर ये सब गोठ ल टार मै सीधा सीधा तोला बतावत हांव डाक्टर चरण दास महंत हर तन के डाक्टर नोहय ओहर मन के डाक्टर आय । तेकर सेति ओहर मनखे मन ल अपन कोति खींच डारथे ।
टिप्पणियाँ
एक टिप्पणी भेजें